«Ордабасы» шабуылшысы Жоао Пауло чемпионаттың мықты ойыншылары, клубтың келешегі мен Қазақстандағы өмірі туралы айтып берді
- "Ботошаниге" қарсы кездесудегі жеңілістің себебі неде деп ойлайсыз?
- Менің ойымша, біздің команда әлдеқайда жақсы ойнады. Біздің мүмкіндіктеріміз көп болды, бірақ дұрыс пайдалана алмадық. Өкінішке орай, мұндай жағдайлар болып тұрады. Дәл осындай жағдай «Қайратқа» қарсы өткен ойында да болды. Біз көптеген мүмкіндіктер жасай алдық. Бірақ бізде уақыт бар. Енді біз ойынға, жаттығу үдерісіне бірнеше түзетулер енгіземіз және жағдайды түзете аламыз деп ойлаймын.
- Қазақстан чемпионатындағы үлкен үзіліске байланысты турнир кестесі басқаша көрініп тұр: бірінші орында «Қайрат», «Астана» екінші, «Ордабасы» алтыншы орында тұр. Бұл орындар чемпионат аяқталғанша ауыса ма?
- Меніңше, пандемия өзіндік түзетулер енгізді. Карантин аяқталғаннан кейін барлық командалар тең дәрежеде болды. Бірақ бұл үзілістің "Қайратқа" пайдасы тиген секілді. Мен әлі де уақыт бар және келесі маусымда Еуропа лигасында тағы да ойнауымыз үшін жеңімпаздардың бірі боламыз немесе ең болмағанда үздік төрттікке кіре аламыз деп үміттенемін. Өзгерістер әлі де болады.
- "Қайрат" пен "Қайсар" Еуропа лигасының келесі іріктеу кезеңіне шыға ала ма?
- Мен солай болғанын қалаймын (күлімсіреді). Қазір мен өзімді қазақстандықпын деп санаймын, сондықтан қазақстандық клубтардың мүмкіндігінше алысқа барғанын қалаймын. Мен оларды шын жүректен қолдайтын боламын.
- Яғни, Қазақстан сіз үшін екінші үй ме?
- Керісінше, бірінші (жымиды). Мен мұнда Бразилияға қарағанда көп боламын.
- Тағы қандай қазақстандық клубтарда ойнағыңыз келеді?
- Шындығында, осы маусымның басында «Тобылдан» ұсыныс болды. Бірақ мен және менің отбасым Шымкентте жайлы өмір сүруде. Негізі мен бұл туралы ойламауға тырысамын. Мен жай ғана алаңға шығып, жұмыс жасаймын.
- Сіз үшін қай ойыншыға қарсы ойнау қиын?
- «Қайраттағы» Нұралы Әліп. Бізде бірнеше рет «қақтығыстар» болды.
- Қазақстан азаматтығы бар үш үздік ойыншы?
- Дмитрий Шомко, Дмитрий Непогодов және Нұралы Әліп.
- Қазақстанның үш үздік легионері.
- Мен тіпті төртеуін атай аламын. Диакате және Фонтанелло. Олар біздің команданың көшбасшылары. Сондай-ақ, Марин Томасов пен Адеринсола Эсеола.
- Сіздің отбасыңыз Қазақстанға келді ме?
- Жоқ. Сірә, әйелім мен балаларым Бразилияда қалады. Біз Қазақстан чемпионаты қашан аяқталатынын білмейміз. Шын мәнінде, бұл мен үшін ең қиын маусым болды, өйткені отбасым жақын жерде емес.
- Сіз ұлттық тағамдардың дәмін татып көрдіңіз бе?
- Иә, мен палау мен бешбармақты жеп көрдім. Маған бәрі ұнады (жымиып).
- Сіз Шымкентте қай жерде көбірек болғанды ұнатасыз?
- Біз отбасымызбен саябақтарда серуендегенді жақсы көреміз. Біз хайуанаттар бағына, «Қиял әлемі» саябағына жиі барамыз.
- Сізге Қазақстанның тағы қандай қалалары ұнайды?
- Маған Шымкенттен бөлек, Алматы ұнайды. Біз бүкіл отбасымен жиі баратын бразилиялық мейрамхана бар. Сіз ол жерде өзіңіздің үйіңізді аз да болса сезіне аласыз. Тағы бірі Нұр-Сұлтан.
- Алдыңғы сұхбатыңызда сіз орыс тілін үйренгіңіз келетінін айттыңыз. Бастадыңыз ба?
- Әлі жоқ (жымиды). Менің 5 жасар ұлым Шымкенттегі балабақшаға барады. Ол менен гөрі орысша жақсы сөйлейді. Ол менің ұстазым (күледі).
- «Ордабасы» командасымен келісімшарт 2020 жылдың соңында аяқталады ма?
- Жоқ. Менің келісімшартым 2021 жылдың соңына дейін жасалған.
Біздің серіктес: FONBET
