Бүгін ҚФФ Төрешілер комитетінің төрағасы, ҚФФ Атқару комитетінің мүшесі Сейілда Байшақовтың басшылығымен жиын өтті. Мұнда OLIMPBET-Қазақстан чемпионатының 1-турындағы "Атырау" мен "Шахтер" матчынан кейін "Мұнайшы" стадионында болған оқиғаны егжей-тегжейлі қарастырып, кінәлілерге жаза тағайындады.
"Төрешінің тәртіптік кодексіне" сүйене отырып, футболдың философиясы мен ойын заңдарын сақтау бойынша халықаралық талаптарға сәйкес, бас төреші моральдық-этикалық мінез-құлық нормаларын бұзғаны үшін ҚФФ төрешілер комитеті мынадай шешім қабылдады:
- Ойыншыны қорлап, онымен этикалық қарым-қатынас орнатпағаны үшін Арман Исмуратов 2021 жылғы маусымның соңына дейін ҚФФ өткізетін барлық жарыстарға қызмет көрсететін төрешілер тізімінен алып тасталсын;
- Төрешілер комитетінің шешімі ҚФФ бақылау-тәртіптік комитетіне берілсін және "Атырау" командасының футболшысы Сәбит Тастанбековке тәртіптік жаза қолдану туралы мәселе қарастырылсын;
- Бұл оқиға бойынша шығарылған шешім барлық қазақстандық төрешілерге жеткізілсін;
- ФИФА мен УЕФА төрешілер комитетіне ҚФФ төрешілер комитетінің шешімі туралы ақпарат жіберілсін.
Біздің серіктес: FONBET
