Нұралы Әліп "Зенит" сапында
Осыдан біраз уақыт бұрын «Зениттің» қазақстандық қорғаушысына «Манчестер Юнайтед» «құда түсіпті» деген ерсілеу естілетін еді.
Мұндай трансфер тіпті қиял-ғажайып ертегісіндей көрінетін. Ал қазір олай емес, жағдай сәл өзгерген. Топ-клубтардың назары ақырындап болсын Орталық Азия аймағына ауа бастады. Соңғы кездегі оқиғалардың фонында, Нұралының «қызыл сойқандар» болмаса да, басқа бір жақсы чемпионаттан шығу мүмкіндігінің бар екенін түсінеміз. Қысқасы, Әліпке байланысты әліптің артын бағайық. Оның үстіне біздің бұл сөзімізді Қазақстан құрамасының негізгі қорғаушысымен байланысты біраз сыбыстар қуаттап отыр. Нақты айтсақ, «Монако», «Рома» мен «Вильяреал» тарапынан қызығушылық бар көрінеді. Жуырда, әлгі командалардың питерлік қорғаушы жайлы мәліметтер жинағаны жайлы жазылған еді. Қандай да бір нақтылық жоқ, бірақ осындайдың өзі неге тұрады? Қазақстандық куәлігі бар ойыншыға топ-5 клубтары қызығып отыр деген сыбыстың өзі кішігірім жетістік. Кім біледі, «жел тұрмай шөптің басы қимылдамайды» емес пе?.
Питерлік команданың өзі қорғаушысымен қош айтысуға аса бейіл емес екен. Онысын, соңғы кезде байқатып та жүр – Сергей Семактың штабы РПЛ-дегі үзілісте бірнеше футболшымен келісімшартты үзуді көздейді деген ақпарат бар. Арасында біздің отандасымыздың амплуасындағы бірнеше ойыншы жүр - Дмитрий Чистяков пен Родригао. Нұралы Әліптің Ресей премьер-лигасында легионер емес, жергілікті ойыншы мәртебесінде доп теуіп жүргенін де ескеру керек. Бізге «Зениттің» бұрынғы гегемониясы аяқталғандай көрінеді, соңғы уақытта РПЛ-дегі бәсекелестік те өскендей ме қалай? Сондықтан, Сергей Семак қорғаныстағы мықты ойыншысынан оңайшылықпен қол үзіп қалмасы анық.
Біздің серіктес: FONBET
