Алексей Шпилевский: «Бізге қарсы ойнайтын командалардың соңғы матчқа шыққандай, ерекше дайындалатынын білеміз»

"Қайраттың" бас бапкері Алексей Шпилевский Премьер-лиганың 3-туры аясында "Таразбен" болған ойын туралы пікір білдірді

– Неге екі тайм екі түрлі болды? Жақсы сұрақ. Біз бірінші таймды өте пассивті өткіздік. Допқа таластағы барлық маңызды сәттерде жеңіліп қалдық. «Тараз» көрсеткен агрессивті ойынға жауап бере алмадық. Ойынның оңай болмайтынын білдік және футболшыларға аса мұқият ойнау керектігін ескертттік. Өкінішке орай, көп қателік жібердік. Екі гол – бұл екі ойыншының ақылға сыймас қателігі. Бағымызға орай, үшінші голды жіберіп алмадық. Бірінші тайм өте нашар болды. Әрине, Үсенов алғашқы секундтарда жақсы соққы жасаған кезде, ойынды әлдеқайда жақсы бастауға болатын еді.

Екінші таймда доппен және допсыз жүргендегі фазалардың орналасуын өзгерттік. Түзетулер енгізіп, екі жаңа ойыншыны шығардық. Осыдан кейін ойын біздің пайдамызға жүре бастады. Жеңіске жету үшін мүмкіндіктер жеткілікті болды. Екінші таймның қорытындысы бойынша жеңіске жетуге міндетті едік.

Ешкімді ренжітпей, қалай дұрыс айту керектігін білмеймін. Өкінішке орай, төрешілердің қателік жасауы жалғасуда. Бұл біздің ойынға ғана қатысты емес, мен басқа да матчтарды көрдім. Осы арқылы адамдардың неге қол жеткізгісі келіп отырғанын білмеймін. Өтірік айту, алдау және қулық – бұл дұрыс дүние емес. Жігіттерге бұл сабақ болады. Біз сөйлестік және келесі матчта не істей алатынымызды көрсететінімізге сенімдімін.

– Көптеген ойыншылардың ұлттық құрама сапынан келгені сезілді ме?

– Әрине, біздің клубтың көптеген ойыншылары өздерінің ұлттық құрамаларында болды. Әр түрлі уақыт белдеулерінде көптеген матчтар өткізді, мұның бәрі әсер етті. Біз бір-ақ рет толыққанды жаттығу жұмыстарын жүргіздік. Бірақ бұл ешқандай да сылтау емес. Бізге қарсы ойнайтын командалардың соңғы матчқа шыққандай, ерекше дайындалатынын білеміз.

– Хосе Канте керемет дебют жасады, гол + пас…

– Иә, бізге дәл осындай футболшы керек болды. Хосе физикалық тұрғыда әлі 100% дайын емес. Ойыншылар ұлттық құрамаға кеткенде ол барлық жаттығуларды бізбен бірге өткізді, сондықтан мен оның бүгін гол соғып, командаға өте жақсы серпін беретініне сенімді болдым. Ол мұны көрсетті және болашақта одан да тиімді және нәтижелі болады деп үміттенеміз.