Месси қосалқы құрамнан шығып, дубль авторы атанып, соңғы үш айда алғашқы рет ойыннан гол соғып, командасының 5-2 есебімен жеңуіне септігін тигізді. Осыған дейінгі бес голын да пенальтиден салған.
«Бартомеу кеткелі екі жұмадан асса да Месси тек он бір метрліктен гол соғуда. Бұл Мессидің қартайғандығының белгісі ме, әлде «Барселонада» ойнағысы келмей ме? Месси пенальтидің корольіне айналды ма?» деген сияқты әңгімелер желіде желіп жүрді. Бүгін Месси осы сұрақтарға тамаша ойынымен нүкте қойды десек те болады.
Месси ойыннан соңғы рет Чемпиондар лигасының өткен маусымында «Наполиге» қарсы өткізген 1/8 финалдық ойынында гол салған болатын. Араға табаны күректей үш ай уақыт салып бұрынғы командаласы Клаудио Бравоның қақпасына 82 минутта ойыннан гол соқты. 22 минут бұрын Бравоны он бір метрлік айып добынан да қапы қалдырған еді. Сөйтіп 1246 минутқа созылған сәтсіз серия «Бетиспен» өткен ойында үзілді.
Месси ойынға екінші таймда қосылса да өзін тамаша көрсетті. Бірінші тайм бойы жолы болмай, тіпті пенальти соға алмай қалған Гризманның гол соғуына керемет мүмкіндік жасап берді. «Барселона» шабуылына жан бітіріп, қос бірдей голды өз атына жазып, соңғы уақыттағы ең тиімді кездесуін өткізді. Жеті бірдей гол соғылған ойыннан үш ұпай еншілеген каталондықтар 11 ұпаймен сегізінші орынға жайғасса, қоржынында 12 ұпайы бар «Бетис» бір саты жоғары тұр. «Барселонаның» «Бетистен» екі ойыны кем екенін де ескергеніміз жөн. Әзірге «Реал Сосьедад» 17 ұпаймен көш бастап тұр.
Марғұлан ЖАҚЫП
Біздің серіктес: FONBET
