Қысқы трансферлер: Азар Мбаппе саудасының бір бөлігі атануы мүмкін

«Реал» Мбаппені қатарына қосу үшін Азарды құрбан етуге дайын

Флорентино Перестің Азарды екі жыл бұрын туриндік «Ювентустың» қатарына ауысқан Криштиану Роналдудың орнын жоқтатпайтын ойыншы қылам деген жоспары талқан болды. 100 млн еуроға сатып алынған белгиялық шабуылшы Роналдудың орнын баспақ түігілі, толыққанды ойынын көрсете алмай жүр. Азар бір жарым жыл ішінде, жарақаттан көз ашпай бар болғаны 3 гол соғып, 7 нәтижелі паспен көзге түсті. Англия шыңын бағындырып келген ойыншыға енді Испанияда примерасында топ жару үшін басты кедергі сол жарақат болып тұр. Эден клубқа келгелі осымен 8-ші жарақатын алды. Бірақ Азардың сонау «Челсиден» бері келе жатқан жанкүйерлері оның бұл кедергілерден шығып, қайта өз бабына келетініне сенеді. Тек бұған сеніңкіремей тұрған королдік клуб жанкүйерлері мен клуб басшылығы.

El Chiringuito TV басылымының хабарлауынша Реал Мбаппені қатарына қосу үшін Азарды трансфердің бір бөлігіне қоспақ. Талай клубтың көзіне түсіп жүрген 21 жасар әлем чемпионын осы маусымда сатып алу мүмкін емес. Себебі париждік клуб Мбаппе үшін кемінде 200 млн еуро сұрап отыр. Ал Реал дәл қазір бұндай қаражатты тауып бере алмайды. Сондықтан Перес ұсыныстың бірден бір бөлігі деп Азарды санап отыр. Бірақ ақшадан еш тапшылық көрмеген ПСЖ-ға ағымдағы маусымда белгиялық ойыншы керек пе? Оның үстіне үнемі жарақат алып тұратынын тағы айтып өткеніміз жөн.