Қызылорда облыстық дене шынықтыру, спорт және турзим басқармасының бұйрығына сәйкес, “Қайсар” футбол клубының директоры қызметіне Талғат Әбдіғаппарұлы тағайындалды. Ол бұрын-соңды кәсіпқой футбол командасында мүлдем қызмет атқарып көрмеген.
Жаңа директорды басқарма басшысы Бақтияр Артаев клуб ұжымына таныстырды. Бахтияр Ғарифоллаұлы команда алдында тұрған зор мақсат-міндетті айқындап, жаңа басшыға сәттілік тіледі.
Өз кезегінде Талғат Әбдіғаппарұлы «Қайсардың» жаңа маусымда жақсы нәтижеге жетуіне атсалысатынын айтып, бар күш-жігерін жұмсауға дайын екенін жеткізді.
Айта кетейік, Талғат Әбдіғаппарұлы 1984 жылы 29 тамызда Қызылорда қаласында дүниеге келген. Қазақстан халықтар достығы инженерлік-педогогикалық университетін дене шынықтыру және спорт мамандығы бойынша оқыған. “Қайсар” футбол клубына дейін облыстық дене шынықтыру, спорт және туризм басқармасына қарасты түрлі спорт мектептерінде лауазымды қызметтер атқарған.
Ал осы кезге дейін, “Қайсар” ФК белгілі спорт менеджері Садық Мұстафа басқарып келді.
Біздің серіктес: FONBET