Қазақстан футбол федерациясының бас хатшысы Азамат Айтхожин Қазақстан – Франция матчының алдында жігіттерге қолдау білдіріп, көрермендерді де елдің бас командасына жанкүйер болуға шақырды:
«Футбол бұл елдің патриоттығын, бірлігін көрсететін спорт. Елі үшін жанын беріп, Отаны үшін отқа түсетін адамдар бір командаға үйлескенде ғана нәтиже болады.
Ұлттық құрамаға келгенде аяғы қанша сырқаттанса да алаңға шығуға ұмтылатын ойыншылар бар. Әлем чемпионаттарында біз осындай оқиғаларды көріп шабыттанамыз.
Қазақстан құрамасының сапында ертең алаңға шығатын футболшының барлығы солай ойнайтын болады. Жігіттердің патриоттық сезімдері дәл қазір өршіп тұр. Серікжан мен Асхаттардың ойыны біз үшін Мбаппе мен Гризманндардан әрқашан артық болады. Жанкүйерлер де солай ойласа екен дейсің. Футбол командалық ойын болса, ұлттық құрама бұл бүтін бір елдің бірлігінің көрінісі. Біз бірігіп қолдау көрсетсек, жанкүйерлікпен жұмылып жұдырық болсақ қана ел футболын жоғары көтереміз.
Қадірменді жанкүйерлер, ертең 19:00-де Қазақстан мен Франция құрамасының кездесуін Qazsport арнасының эфирінен тамашалаймыз.
Алаңның сыртында отырып аяқтан шалғанша, жүрегімізбен жанкүйер болайықшы!», – деді Айтхожин мырза инстаграм парақшасында.
Біздің серіктес: FONBET