Естімеген елде көп. Англияның Бірінші лигасында өнер көрсететін «Болтон» клубын жанкүйер жаттықтырады.
Кезінде АПЛ-де тәуір нәтиже көрсеткен команда Чемпионшиптен де құлдырап, қазір Бірінші лигада бақ сынауда. Жуырда клуб басшылығы бас бапкерін қызметінен босатып, оның орнына Джулиан Дарби есімді жанкүйерді уақытша бас бапкер етіп қойған. Ең қызығы, Джулиан алғашқы матчында-ақ сырт алаңда турнирлік кестенің жоғары сатында келе жатқан «Хаддерсфилдті» жеңіп, айды аспанға шығарып отыр. Ұзақ жылдар бойы «Болтонға» фанат болған Дарби бұрын команда академиясында балаларды жаттықтырған екен. Қиын сәтте өз қызметін ұсынған ардагер бір күнде мыңдаған жанкүйердің сүйіктісіне айналды. Егер, ол алдағы ойындарда да тәуір нәтиже көрсетсе чемпионаттың соңына дейін «Болтонды» жаттықтыра бермек. Қазір олар турнирлік кестенің 9-орнында тұр.
Айта кетейік, Англияның Бірінші лигасында қазақстандық меценат, «Каспий» банктің төрағасы Михаил Ломтадзе сатып алған «Уикомб Уондерерз» клубы да өнер көрсетеді.
Біздің серіктес: FONBET